Vuoittut juogaduvvojit ná:
I vuoitu: 1 200 Euro
II vuoitu: 850 Euro
III vuoitu: 600 Euro
Suoma bargo- ja ealáhusministeriija váldá váldovuoitái oktavuođa bálkkašumi máksima birra.
Oppalaš gilvonjuolggadusat ja searvaneavttut
1. Searvamis eaktuduvvo ahte buohkat čuvvot njuolggadusaid. Buohkat geat servet gilvui dohkkehit njuolggadusaid.
2. Buot gilvovuoittut leat almmuhuvvon njuolggadusain ja eará vuoittut eai juogaduvvo. Vuoitosupmi máksojuvvo vuoiti báŋkokontui guovtti (2) vahku siste vuoitobeaivvi maŋŋá.
3. Lágideaddji ii vástit vearuid ja divadiid vuoittuid ovddas. Vuoiti ovddasvástádussii gullá hálddašit vejolaš vuoitodivadiid, go iešguđet riikkain leat iežaset vearroortnegat.
4. Gilvu lea rabas buohkaide. Oasseváldit sáhttet boahtit vaikko gos máilmmis, muhto govva galgá leat váldojuvvon Barents guovllu davviregiovnnain (Suopma, Ruoŧŧa, Norga). Gilvolágideaddjit dahje duopmárat eai sáhte searvat gilvui. Vuollel 16 jahkásaš mánát fertejit fuolaheaddjiin oažžut lobi searvat gilvui. Fuolaheaddjit vuostáiváldet maid vuoittu máná ovddas, ja galget maid vástidit vejolaš vearrogeatnegasvuođaid.
5. Jos háliidat searvat gilvui, de fertet sáddet gova JPEG-formáhtas neahttasiiddu www.discoverbarents.com bokte. Gova sturrodat galgá leat unnimustá 1600 piksela. Muđui eai gusto eará gáibádusat gova sturrodahkii dahje eará govvagáibádusat. Govva galgá leat govvejuvvon Barents guovllu davviregiovnnain (Suopma, Ruoŧŧa, Norga) jagis 2023. Galggat maid čilget gos govva lea govvejuvvon ja goas.
6. Govvagilvvu 2023 fáddá lea Gierdogeavvaekonomiija Barents guovllus, ja eaktuduvvo ahte govat leat dan fáttá birra. Mii fuomášahttit ahte olbmot geat leat govvejuvvon galget mieđihit dasa ahte govaid sáhttá almmuhit ja ahte dat sáddejuvvojit govvagilvui. Oasseváldi ferte ieš fuolahit mieđiheami ovdal go govaid sádde. FUOM: Jos vuollel 16 jahkásaš mánát leat govvejuvvon, de gáibiduvvo miehtan máná váhnemiin.
7. Juohke oasseváldi sádde eanemusat guokte (2) gova, muhto dušše okta govva sáhttá vuoitit.
8. Oasseváldi galgá álo geavahit iežas nama gilvvu oktavuođas. Jos eará namma geavahuvvo, de sáhttá massit vuoittu.
9. Govvagilvui searvama bokte dáhkidat ahte don leat gova eaiggát, ja ahte it rihko vejolaš dahkkivuoigatvuođaid, gálvomearkkaid, personsuodjaleami dahje moralalaš vuoigatvuođaid, ja ahte earáin eai leat makkárge gáibádusat gova hárrái.
10. Govvagilvui searvama bokte addet buot oasseváldit lágideaddjái lobi máŋget, čájehit, prentet dahje geavahit gilvogovaid vihtta jagi maŋŋil go govvagilvu lea loahpahuvvon. Ovdamearkka dihte sáhttet govat geavahuvvot Barents guovllu márkanastimis. Lágideaddjis lea maid lohpi govaid geavahit eará mediain (maiddái sosiála mediain).
11. Govat mat sáddejuvvojit govvagilvui vurkejuvvojit oktasaš govvagalleriijai gos sáhttet geavahuvvot ovdalis namuhuvvon ulbmiliidda govvagilvvu maŋŋá. Eaktuduvvo ahte son gii govaid geavaha muitala gova ja govvejeaddji birra. Govaid sáhttá neahtas viežžat iešguđet formáhtas, muhto fertet vuos iežat registreret neahttasiiddus. Govaid sáhttá neahtas viežžat vihtta jagi govvagilvvu maŋŋá.
12. Lágideaddjis lea vuoigatvuohta almmuhit govvejeaddji ovdanama, goarggu, ruovttubáikki ja ruovtturiikka buot gilvooktavuođain.
13. Lágideaddjis lea vuoigatvuohta govvagilvui sáddejuvvon govaid redigeret ja čuohppat jos lea dárbu daid heivehit. Govvejeaddji namma galgá almmuhuvvot buot govain mat almmuhuvvojit.
14. Gilvolágideaddjis lea vuoigatvuohta mearridit galget go gilvogovat čalmmustahttojuvvot gilvogalleriijas. Govat eai almmuhuvvo jos giige oamasta dahkkivuoigatvuođaid govaide, dahje jos dat čájehit veahkaválddálašvuođa/pornografiija dahje eará heivetmeahttun áššiid.
15. Govvagilvu lea áigodagas 23. njukčamánu 2023 – 23. suoidnemánu 2023 man maŋŋá álbmogiidgaskasaš duopmárgoddi vállje vuoitiid suoidne-borgemánu 2023 áigge. Vuoitiid almmuhit Barents guovllu euroárktalaš ráđi čoahkkimis golggotmánu 23.-24. beaivve 2023 Joensuus, Davvi-Gárjilis Suomas. Gilvvu bohtosiid almmustahttit www.discoverbarents.com neahttasiidduin. Buot vuoitit ožžot dieđu, jus fal rivttes oktavuođadieđut leat midjiide sáddejuvvon.
16. Lágideaddjis lea vuoigatvuohta rievdadit gilvonjuolggadusaid goas beare.